Read my blog in your own language

EnglishFrenchGermanSpainItalianDutchRussianPortugueseArabic

الحلقة الرابعة بعنوان (عمل جدول)

الأربعاء، يوليو 04، 2012

الحلقة بتعاتنا بعنوان (إعملى جدووهايكون ل)  عندنا أكثر من جدول
الجدول الأول :- نعمل الجدول ده بعد ما خلاص تكونى عرفتى كل مشاويرك ...تجيبى ورقة وتعملى جدول لمدة أسبوعين لحد أول يوم رمضان ....أول خانة فيه اليوم(السبت او الأحد....) وثانى خانة فيه(التاريخ 5/7) وثالث خانة (العمل اللى هاتقومى به) ممكن يكون خارجى (شراء) او داخلى(فى البيت)  والجدول ده بيكون قبل رمضان بأسبوعين علشان الإسبوع الأول بيكون (خارجى) مشاوير الشراء والإسبوع الثانى بيكون(داخلى) تجهيز أكلات رمضان والتنظيف وعزومة أول يوم.
الجدول الثانى :- بعد ما تكونى جربتى وعرفتى انتى هاتعملى إيه فى رمضان وده يبقى قبل رمضان بإسبوعين او طول السنة علشان نلحق نكتب طلباتنا ونشتريها ونجهز التجهيزات...
 هاتقومى تجيبى ورقة وتعملي فيها هذا الجدول كالأتى:
صورة مصغرة من شكل الجدول
اليومأكلاتمشروباتحلويات
1
2
3
4
5
6
7
إلى 30 يوم

شرح الجدول
يتم عمل جدول من 4 أعمدة ومن31 صف
الصفوف 30 واحد بعدد أيام رمضان وصف بنكتب فيه عوانين الجدول
 الأعمدة وتشمل: العمود الأول : بكتب فيه (رقم اليوم) 1-2-3-4 الى 30 يوم (يشمل عدد ايام رمضان القصوى) ممكن يبقى 29 انا بعمل على اقصى حاجة 30 يوم وبعمل حساب اول يوم العيد.
 العمود الثانى: بكتب فيه (أكلات) اللى انا جربتها واللى انا أعرفها والأسرة تجتمع عليها وبتحبها علشان ده صيام وهى دى الوجبة اللى بنتلم فيها فلابد ان الكل يكون مبسوط ويقوم شبعان ان شاء الله ...وهنا بكتب كل يوم ممكن أعمل ايه علشان ما اشغلش نفسى فى رمضان كل يوم الصبح واسال نفسى اطبخ ايه؟؟ وابقى محتارة واحياناً بتكونى مضيقة مش عارفة تطبخى ايه لكن لما تكتبى كل يوم ممكن تطبخى ايه يبقى لا هاتحتارى ولا تضيقى:
مثال 1- مكرونة باشميل+ سلطة بنجر+فراخ بانيه+بطاطس شيبس
2- بسلة وأرز+ سلطة خضراء
3- محشى +سلطة خضراء+جلاش+بطاطس+فرخة
شفتى المثال :- الأكلة تكتبى فيها: الطبق الرئيس زى محشى ..مكرونة باشميل...إلخ وكمان معه السلطة المناسبة للإكلة يعنى لو نواشف بتكون عايزة سلطة بنجر او كول سلو....والخضار بيحتاج سلطة خضراء وممكن يكون مع الوجبة زى المحشى جلاش باللحمة المفرومة (او الفراخ اوالتونة ) وبطاطس وممكن لحمة وممكن لأ.
ويكون الجدول فيه توازن يعنى أكلة فخمة باشميل وفراخ فى يوم واليوم التانى بسلة وأرز ويجى اليوم اللى بعده نرفعه شوية بالمحشى ومعه جلاش وهكذا يوم لحوم ويوم خفيف ويوم فراخ . وده مش هايخلى اسرتك تزهق من الأكل ولا تكلفى نفسك فوق طاقتها.
هاتقولى ممكن الأكلة تقعد عندى يومين ولكن فى الجدول اعملى حسابك ان الأكلة يوم علشان يبقى عندك احتياطى لو فضل من الأكل يبقى خير وبركة ولو مفضلش يبقى انتى فى الأمان..ليه ..علشان ممكن جوزك يجوع جداً وعايز ياكل من الأكل تانى او الأولاد وممكن يجيلك حد فجأة ساعة الأكل يبقى ياكل بالهنا والشفا ..وعندنا بكرة عارفين هنعمل ايه.
العمود الثالث: بكتب فيه ( المشروبات ) كل يوم ايه المشروب اللى هايكون موجود وأوعى تنسى التوازن مثال:
1- على الفطار الخشاف التمر هندى وعصير مابعد الفطار زى العرق سوس
2- على الفطار الخشاف التمر هندى وعصير مابعد الفطار زى السوبيا
3- على الفطار خشاف التمر باللبن ومعه عرق سوس....وهكذا يومين يومين مع الإبدال
العمود الرابع: بكتب فيه (الحلويات) وهنا بكتب الحلويات اللى انا هاعملها على مدار الشهر وخلى بالك من التوازن ...
مثال: 1- قطائف
2- كنافة
3- جلاش
4- قطائف..... وهكذا ولازم طبعاً القطائف تحتل الصادارة لإنها هى من مميزات الشهر الكريم

ملاحظات مهمة من أختك أم أسوة
رمضان جاى فى أشد أيام الصيف وهو من حوالى 20/7 الى 20/8
1- لازم يكون أكلاتك خفيفة علشان الحر، يعنى متكتريش من الحاجات اللى فيها صلصة حمراء او الأكلات الدسمة.
2- مشروباتك.. لازم تهتمى بالمشروبات والعصائر (وخشاف اللبن ممكن تقدميه ساقع ).
3- احرصى على توافر المياه الساقعة دائماً.
4- سحور خفيف وقليل وصحى (سحور فرد...ممكن يكون بيضة وعلبة زبادى وخيارة مع جبنة وبطيخ)
5- ليس هناك أجمل ولا أعظم من قوله تعالى : " كلوا واشربوا ولا تسرفوا إنه لا يحب المسرفين "
فقد نهى الإسلام عن الإسراف والإفراط في تناول الطعام . وورد عن رسول الله ( صلى الله عليه وسلم ) أحاديث عديدة تنهى عن الإمعان في الشبع ، والشره في الطعام
والشراب .
فعن إبن عباس - رضي الله عنه - قال : قال رسول الله ( صلى الله عليه وسلم ) :
" إن أهل الشبع في الدنيا هم أهل الجوع غداً في الآخرة "
وروي عن أنس بن مالك - رضي الله عنه - قال : قال رسول الله ( صلى الله عليه وسلم ) :
" من الإسراف أن تأكل كل ما تشتهيه " .
وليس هناك أحكم من حديث رسول الله ( صلى الله عليه وسلم ) الذي يوصي الإنسان وهو
يأكل بأن يدع ثلثاً لطعامه وثلثاً لشرابه وثلثاً لنفسه .

وده كله ليه علشان نعرف نصلى قيام الليل مش جلوس الليل(تملئ المعدة ثم تصلى جالساً...كيف لك هذا !)
يبقى نأكل خفيف علشان نسيب مكان للماء الذى سنشربه ومكان للعصائر ونخلى مكان للحلويات ....وأهم حاجة نخلى نفس وصحة للصلاة والقيام وده اهم حاجة فى رمضان
أختكن فى الله أم أسوة

تقبل الله منا ومنكم صالح الأعمال

 
Flag Counter

متابعينا الكرام...مرحباً بكم

عدد مرات مشاهدة الصفحة ..