الحلقة السابعة بعنوان (مطبخى فى رمضان)

ثانياً:- أعمال المطبخ وهى ترتيب مطبخى و تجهيز بعض الأكلات التى تساعد فى التقليل من وقوفى فى المطبخ لساعات طويلة على مدار اليوم.

أولاً: تنظيف وتجهيز المطبخ

 وده غير تنظيفة الشقة لإنى باقوم بتنظيف الجزء الداخلى أول حاجة قبل شراء طلباتى وخزين رمضان أما تنظيفة الشقة بتكون قبل رمضان على طول بيومين او تلاتة وهى إزالة الأتربة وغسل السيراميك والحوض والتلميع الخارجى.

طريقة العمل:-

1- أرتب أدراج المطبخ  من الداخل وإفراغ جميع محتوياته وهذا لمعرفة مالدى من اشياء وما انتهى من أشياء وبيكون قبل ما اكتب ورقة الطلبات وابدء اجيب ورقتى واكتب كل حاجة ناقصة عندى.

2- أقوم بتنظيف وتلميع هذه الأدراج ثم إدخال الأشياء وترتيبها مرة ثانية.

3- غسل برطمانات التوابل كلها وتعبئتها من جديد

4- تنظيف الثلاجة:  قبل شرائى حاجات رمضان باحاول انهاء

مالدى فى الثلاجة ثم أقوم بتنظيفها.

هذه ثلاجتى بعد التنظيف وإفراغها من كل شئ

وهكذا بيكون المطبخ جاهز على تنظيفة الشقة فأنا لاأنظفه إلا مع الشقة.

ثانياً: تجهيز الأكلات

بعد تجهيز المطبخ والثلاجة أنا كده جاهزة علشان أجيب طلباتى وترتيبها فى المطبخ والبدء فى تجهيز وحفظ الأكلات.

لستة التجهيزات

أوعى تنسى ده باعمله بعد ماأخلص مشاويرى

هى ورقة بكتب فيها كل حاجة ممكن اجهزها قبل رمضان وتوفر لى وقت  فى المطبخ

خذى عندك وأدعيلى

بالنسبة لتجهيز الحلويات

1- عمل الشربات: انا باعمل شربات اللى ممكن استخدمه فى رمضان كله مرة واحدة واحفظه فى الفريزر فى علب صغيرة كل ما اعمل حاجة حلوة اطلع الشربات بتاعى قبلها بخمس دقائق واسقى الحلويات بتاعتى.

انا باحتفظ طول الصيف بعلب الأيس كريم علشان احفظ فيها الحاجة بتاعتى

(يبقى انا كده وفرت من 10الى15 دقيقة ممكن اقفهم فى المطبخ فى عمل الشربات فى يوم واحد).

2- عمل خلطة المكسرات: طبعاً المكسرات بتكون غالية عندنا فى مصر ولكن انتى ممكن تجيبى واحد كيلو سودانى معه تمن كيلو لوز وتمن كيلو بندق وممكن تمن عين جمل وتحمصى اللوز والبندق فى الفرن ثم تدقيهم مع السودانى وتحطى عليهم زبيب وجوز الهند وتقلبيهم كويس وتكونى كده عاملتى احلى تشكيلة مكسرات وتحطيهم فى برطمانات زجاج (انا طول السنة باشيل برطمانات المربى والصلصة بعد غسلها كويس علشان كده) وتحطيهم فى الفريزر على طول مش الثلاجة علشان مايجلدوش الفريزر هايحتفظ بيهم زى ماهما.

*خلى بالك السوائل باشيلها فى علب بلاستيك والنواشف فى الزجاج.

*بلاش السودانى المقشر الجاهز من بتاع الحلويات، اشتريه طازج وسخن من محمصة حلوة .

(يبقى انا كده وفرت وقت كل يوم اعمل خلطة مكسرات كل ما احب اعمل حاجة حلوة)

3- عمل بعض الحلويات للظروف: بحشى شوية سمبوسة بالمكسرات واشيلها فى كيس وممكن قطائف تحشيها وتشيلى فى أكياس للظروف...انتى ممكن تكونى  تعبانة اوكان عندك بواقى وخلصت وجالك ضيف.. تطلعى وتقلى على طول.

ده بالنسبة للحلويات

يبقى انا هاصحا الصبح اجيب الكنافة او القطائف واجيب المكسرات من اللى عملتها احشى واقلى واطلع الشربات بتاعى واسقى.

بالنسبة لتجهيز العصائر

1- عمل عصير قمر الدين :انا باجيب قمر الدين كله واقطعه وانقعه واضربه فى الخلاط واحليه بالسكر واتذوقه ولما اتأكد انه تمام اعبئه فى زجاجات صغيرة واشيلها فى الفريزر.

2- خلطة الخشاف:- باجيب البلح وانزع البذر منه واجيب القرصية وانزع البذرة منها واقطعها واجيب التينية والمشمشية واقطعهم واقلبهم مع بعض واقسمهم على أكياس كل كيس على قدنا مع حساب أكياس العزومة ...بتكفينى رمضان كله.

(يبقى كده انا وفرت وقت كبير فى نزع البذر والتقطيع ).

يبقى انا هاصحا الصبح اطلع زجاجة قمر الدين وكيس الخشاف بتاعى انقعه فى قليل من الماء مع إضافة قليل من الزبيب وقبل الفطار اضع عليه قمر الدين وخلاص.

3- بلح خشاف اللبن:- باشيل بلح لوحده بعد نزع البذر فى اكياس لخشاف البلح باللبن.

(دى حاجات بتأخذ وقت وتجهيزها بيوفر وقت)

وممكن تخزنى عصائر جوافة او برتقال

بالنسبة لتجهيز الأكلات

1- تعصيج اللحمة المفرومة:- باعصج اللحمة المفرومة واشيلها فى علب على أد كل أكلة (اول ما أصحى أطلعها تفك وأستخدمها على طول)

2- عمل خلطة من فراخ البانيه لحشى سمبوسة او كريب...إلخ

3- ضرب كمية الطماطم اللى هاستخدمها وأحفظها فى علب على قد الوجبة

4- عمل عجينة كريب وحفظها فى الفريزر

5- عمل عجينة الازانيا وحفظها فى الفريزر

6- تنظيف الخضار اللى هاعمله فى رمضان ( بسلة وفاصوليا وبامية وملوخية.....وحفظها فى الفريزر كل أكلة لوحدها

7- ممكن تعمل كفتة وتتبليها وتصبعيها وفى أكياس تحفظيها وكذلك أقراص همبرجر

8- نظفى فراخك وشيليها

وكل واحدة ممكن تشوف هى عايزة تعمل ايه فى رمضان واللى ممكن يجهز قبله... تجهزه.... هاتوفرى وقت وجهد غير عادى فى رمضان.

 الحلقة الثامنة بعنوان ( العزومات فى رمضان)

أختكم فى الله أم أسوة