أحلى سيانبون بجد من مطبخى

أرجو ان يعجبكم الموضوع ويكون مفيد لكم ....والرد عليه ولو بكلمة شكراً إذا أضاف لكم جديد وتذكروا من لم يشكر الناس لم يشكر الله تعالى....ان اصبت فمن الله وان اخطأت فمن نفسي والشيطان....أختكم فى الله أم أسوة

 

أحلى سينابون ممكن تتذوقيه بطريقة مضمونة 100فى100

أولاً: ماهو السينابون : معناها بالإنجليزية هو القرفة ....اه علشان تكونى متنورة ومش بتقولى كلام عانجليزى مش عارفة معناه

معناه المطبخى : هى عجينة تحشى زبدة وقرفة وسكروتخبز وتزوق بالسكر او الشوكولاتة

انا من سنة واكتر نفسى اعمل السينابون مش علشان بحبه انا اصلاً معرفهوش وعمرى ماتذوقته ولكن شوفته فى النت كتير وشوفته فى التيلفزيون ونفسى اجربه بس مش عارفة اللى كان بيحصل كل مرة المهم قررت ان اجربه ونجحت الطريقة والحمدلله

طبعاً انا لما اجيب باجيب من النت ومقادير حد جرب انزل عندى على الكمبيوتر كذا طريقة واقارن بينهم واضيف من هنا الى هنا بعض الإضافات اللى عارفة انها تحسن ولا تخرب العجين حتى حصلت على مقادير مناسبة.......وطبعاً عملية الدمج هذه جاءت بعد سبع سنوات من التجربة والقراءة ومحاولة المقارنة بين المقادير والأوزان

 

وإليكم أحلى المقادير

خمسة وثلاث ارباع كوب دقيق
 ربع كوب سكر (انا بحب اطحنه)
ربع كوب سمن

2 ملعقة خميرة (انا افضل الطازة بتاعة الفرن) اجيب قطعة مربعة مناسبة واضعها فى علبة عميقة معها معلقتين شاى سكر واغطيها واسيبها حتى تختمر وتتضاعف
 ملعقة ملح صغيرة  + 2 كيس لبن بودر (الكيس 25 جرام)
  ماء دافئ انا بحط علبة صغيرة اضيف حبة بحبة حتى تظبط معى العجينة ....انا لا اتعامل بمقدار للماء فنى معرفش الدقيق بتاعى ممكن يأخذ اد ايه ...احط حبة وكل مااحتاج اضع حتى تظبط العجينة لو زاد منى الماء فى العجينة أزود حبة دقيق واعجن كويس جداً حتى احصل على عجينة طرية

 الحشوة:

  سكر بني (لسة لم اجد هذا السكر فى السوبر ماركت وعلشان كده انا استعملت مكانه سكر ابيض ناعم )+ قرفة مطحونة

 الطريقة:

تعجن كل المقادير وتترك العجينه لمدة ساعة حتى تخمر فى مكان دافئ( انا باشغل الفرن شوية لمجرد انه يدفئ مش يسخن ثم اطفى واحط العجينة بعد تغطيتها جيداً)

 

 بعد ان تخمر العجينة يفرش سطح الرخامة دقيق

تفرد العجينة على قد ماتقدرى رفعى سمك العجينة علشان لسة هيتلف على بعض 

 

يدهن سطح العجينة بالزبدة السائلة ثم ترش القرفة على العجين ويفضل وضعها فى مصفاة ورشها من خلالها علشان توزع بشكل جيد

ثم سكر بودر

ثم تلف سويسروال

ثم تقطع حسب المقاس للى تحبيه

ثم ترص فى صوان مدهونة زبدة على مسافات متابعدة لإنها تتضاعف اثناء التخمير واثناء السوى

 

ثم تترك فى فرن دافئ لتخمر مرة اخرى وهذا شكلها بعد ان تخمرت تتضاعف وزاد

وهذا شكلها بعد دخولها الفون وطبعاً على فرن متوسط لمدة صغيرة من تحت ثم ترفع فوق وتشغل الشواية لإحمرار وجها

انا هنا حطيت لبن مركز

 

وهنا شوكولاتة

وهنا حطيت الشوكولاتة بشكل حلمنتيشى وده فنى كنت تعبت ومفيش دماغ للتزويق وعلشان كان اهم حاجة عندى هو تجربة العجين وبعد كده التزويق يجى

وهذا هو شكل العجينة من الداخل شايفين هش و خفيف وتحفة وماشاء الله علية بجد

بجد بجد تاكلوا صوابعك وراحها

يلا قومى جربى وما تخفيش فرحى جوزك وعيالك

ولو نجحت اعملى مقدار وروحى زورى قريبك ورحمك ادخلى عليهم السرور كل مرة تزورى حد خدى حاجة من اللى بتنجح معاك

 

  بالهنا والشفا والف صحة وعافية عليكم

المرة الجاية هاجرب الدونات كنت عاملتها زمان ولكن نسيت طريقتها هادور تانى وافاضل بعد كده احط المقادير بتاعتى واعملها وانزلها لكم

قوالوا ان شاء الله

السلام عليكم ورحمة الله وبركاته