وصفة من وصفات الباف باستري ( الرقائق الهشة )

أرجو ان يعجبكم الموضوع ويكون مفيد لكم ....والرد عليه ولو بكلمة شكراً إذا أضاف لكم جديد وتذكروا من لم يشكر الناس لم يشكر الله تعالى....ان اصبت فمن الله وان اخطأت فمن نفسي والشيطان....أختكم فى الله أم أسوة

السلام عليكم ورحمة الله وبركاته

بسم الله الرحمن الرحيم

وبه نستعين

من المهم انه نعرف بعض الوصفات الخاصة بالحلويات السهلة والسريعة علشان الضيف المفاجئ او الضيف السريع

ومن الحلويات السهلة والسريعة وصفات من عجينة البف باستري

اليوم معايا هذه الوصفة

هذا شكل عجينة البف باستري بتبقى موجودة في كل الهايبرات

الكيس فيه 15 واحدة

هي عبارة عن عجينة مربعات بنشتريها ونحطها في الفريزر....تمام
زوجك اتصل عليك ومن غير سلام ولا كلام قالك اعملي حسبابك فلان او الأسرة الفلانية جاية امتى بعد شوية 
وشك يحمر ودماغك تصدع وهنا شوش بيكون حضر 
استعيذي بالله من الشيطان الرجيم 
ولا يهمنا احنا مجهزين نفسنا
طلعي الباف باستري على طول وسيبيها تفك 
واجري روقي الشقة من على الوش اي حاجة تحت السري ارمي ولمي اللعب وفي الدولاب وبالمكنسة مطرح العيال وتلميعة ورشة معطر 
واجري على المطبخ 
هاتكون فكت

شكل الباف باستري بعد ما طلعتها من الكيس

 انا لما اطلعها ارش على الوجهين دقيق زي اى عجينة علشان ماتلزقش

دول الأربعة اللي كانوا موجودين واللي جاي كان واحد قلت حلو يبقى اتنين لزوجي واتنين للضيف 

 الحشو زي ماتحبي بس انا حبيت احشي على الوجه ( جبنة كير قطعيها واهرسيها كويس بالشوكة وضيف عليها حليب محلي علشان الطعم ودوبيهم في بعض كويس) وزي ما انتي شايفة وضعت معلقة من الحشو في النصف علشان انا مش هالفها

ووزعت بالملعقة على الوش كله

 ده شكلها لما طلع من الفرن تبقي وقفة على الفرن مستنية مش بتاخد 10 دقائق واقل على درجة حرارة متوسطة عينك ميزانك تقدري تعرفي بيها فرنك

التقديم النهائي رشة بودة سكر مع شريحة فروالة قطعتها زي مانتي شايفة ده كان حظ الضيف ان كان في فروالة وانا حطتها علشان تنطق اللون وعلشان تفخم الحاجة الحلوة طب انتي ماعندكيش يبقى نجيب ديماً كده ب2 جنيه كريز ونشيلهم لما احتاجهم احطهم لإن اللون الأحمر بيقى جميل 

 وجاء الضيف والحمد لله كنت اضع السكر والفروالة اثناء وجوده وتم تقديم الطبق وبعد انتهاء الزيارة خرج زوجي لإيصال الضيف وسريعاً دخلت الحجرة وهى عادتي لمتابعة ماذا حدث فيما قدمته باكون سعيدة لما بيكون خلص علشان ده معناه ان الحاجة عجبت الضيوف
المهم لما دخلت وجدت قد تبقت واحدة فكنت سعيدة فجلست افكر فذهب تفكيري ان الضيف اكل واحدة وزوجي اكل اثنين فأخذت الرابعة المتبقية واكلتها حتى اتأكد وأطمئن على المنتج وكنت عملته قبل كده بس حبيت أطمئن وبصراحة كانت مغرية وأكلتها بالهنا والشفا وكان طعمها جميل 
وجاء زوجي ودخل الحجرة يبحث عن القطعة المتبقية وجاء يسألني عنها فأخبرته اني أكلتها والحمد لله  وقلت له مش انت اكلت فأخبرني ان الضيف هو من أكل الثلاثة  وكانت عجباه واتكسفت اكل الرابعة والظاهر هو كمان وفضلت قلت لما اطلع اكلها...
هاهاهاهاهاهاها....ولكن غيرها في غيرها

وممكن تعملي منها أشكال بالقطاعات وده كان في مرة تانية عملتها للبيت والأولاد 

وممكن بالقطاعات تقطعى اشكال زي ما انتي عايزة


الصواني مدهونة زبدة


وهذا شكلهم في الصواني كنت بضع واحدة مفرغة على واحدة سليمة والحشوة فى الفراغ 

وده شكل القطاعات من الأدوات الحلوة اللي ممكن تستخدميها في حاجات كتير زي عجينة السكر تقطعى وردات او قلوب حسب شكل القطاعات او تقطعي البسكويت وانا بقطع بالوردة الكبيرة واعمل من الكيكة الكبيرة ميني كيك والأولاد بيحبوا ديما كل ماهو جديد وتنوع متزهقيش الولاد  وزوجك يا ام محمد موعي وجددي بنفس الحاجة

وممكن تقليها في الزيت ولكن الفرن اصح ولكن هي بتدي مذاق مختلف

 وتحطي عليها شوكولاتة وتزوقيها زي ما انتي

أنا الأولاد كانوا مستعجلين حطيت الشوكولاتة عادي كان نفسي اعملها لهم خطوط ولكن قال لي ياماما احنا عايزنها كده وبصراحة التزويق بالنسبة لي تركيز ودماغ وهم مستعجلين مش هاعرف اعمل حاجة 
الأولاد كانوا مبسوطين منها خالص
والحمد لله الذي بنعمته تتم الصالحات 
يارب افيدكم 
وجزاكم الله خيراً
أختكم أم أسوة