الحلقة الثانية:الادوات والخامات المستخدمة في عملية التنجيد

أرجو ان يعجبكم الموضوع ويكون مفيد لكم ....تجربتي الشخصية قد تنجح معك أو تفشل ....فعليك ان تأخذي منها مايناسبك وتتركي ما لايناسبك ...عليك أن تجربي وتفشلي وتنجحي هكذا الحياة...ان اصبت فمن الله وان اخطأت فمن نفسي والشيطان....أختكم فى الله أم أسوة

السلام عليكم ورحمة الله وبركاته

اهلا ومرحبا بكم معنا في الحلقة الثانية وهي اللي هانتكلم فيها عن الخامات والأدوات المستخدمة في عملية التنجيد إن شاءالله وسيكون الموضوع موضح بالصور والاسماء والأسعار....

لما قررت خلاص اني انجد بدأت اتفرج على كل الفيديوهات اللي سجلتها في التنجيد ولكن للأسف لم أجد ما أريده بالظبط ولكن فتح لي المجال في بعض الخطوات وبعض الطرق المستخدمة في عملية التنجيد وكنت أشاهدها كثيراً لجمع الخامات والأدوات اللي هاستخدمها بمشيئة الله

وبالفعل بعد عملية المشاهدة بدأت ادور من خلال البحث في جوجل على أسماء الخامات اللي هاستخدمها .

أجمعت أمري وبدأت أكتب الطلبات ونزلت بصراحة لم اكن اعرف ما أحتاجه بالظبط كان في حاجات سهلة ومعروفة زي القماش الكاوتش الدبابيس الدباسة وفي حاجات مش عارفة اجيب منها ايه وكام زي الاسفنج ولكن كتبت الطلبات  ونزلت اشتريت اللي كتبته اشتريت كل ما يخص الأساسيات الأولى ثم نزلت مرة ثانية أكملت فيها مشترياتي التي كنت عرفتها من خلال العمل المبدئي من مشتريات المرة الأولى
ولكن الأن أنا جمعت لك كل مايمكنك إستخدامه في عملية التنجيد ولكن ممكن يكون هناك إضافات حسب الموديل الذي تريديه 
الخامات كالأتي:

١/الكاوتش أوالسوست:

أول حاجة في التنجيد تركيب الكاوتش أو السوست اتفرجت على ده وعلى ده ولكن الأفضل بالنسبة لي وجدته في الكاوتش ....

2/ الأسفنج:

الأسفنج ده بمزاجك يعني ايه هو بيكون مقاسات كتير وانتي براحتك عايز الظهر عريض عايزة اليد ضخمة عايزة القاعدة رفيعة أو عريضة هاتشوفي الموديل وتجيبي المقاسات اللي تعطيك هذا الشكل.

هاقولك انا اخترت ازاي الأسفنج في حلقة اختيار وشراء الخامات.

3/ فيبر رول:

وده عبارة عن فيبر رول واحد مش مقطع وهذا النوع من الفيبر بنستخدمه في التنجيد الأساسي وشلتة قاعدة الكنبة .

4/ فيبر عادي:

وده فيه أنواع وأسعار
النوع الأول: اللي بيتغسل وده ليه سعر أعلى  ويستخدم في الشلت اللي ملهاش سوست علشان تحطيها في الغسالة بالكسوة  لو انتي هاتغسليها .
النوع الثاني : مش بيتغسل وده أرخص وبتجيبيه في الشلت العادية اللي بالسوستة تفكي السوستة وتفصلي الشلتة عن الكسوة الخارجية وتحطي الكسوة في الغسيل وبعدين تركيبها بعد ماتنشف.

وده انا جبت منه علشان كنت عارفة أن الشلت عندي هاتكون بسوست وحجمها هيكون كبير ولكن لو استقبلت من أمري ما استدبرت كنت جبت اللي بيتغسل علشان يكون في مساحة أكبر في موديلات الشلت.ولكن مش مشكلة .

6/قماش بفتة: 

وده فيه أربع أنواع بأربع اسعار 

النوع الاول : وده أرخص حاجة ال٣٠ متر ب٤٥جنيه وده زي الشاش هتلاقي كل شلت اللي موجودة في المنصرة معمولة منه افتحي الكسوة واتفرجي عليها (لم اشتري منه)

النوع الثاني: ود اتقل شوية ب٦٥جنيه ال٣٠ متر وده جبت منه للشلت

النوع الثالث : وده ال٣٠ متر ب٩٠ جنيه وده اتقل من الثاني عملت منه الفرشة اللي قبل الأسفنج 

النوع الرابع : وده الأفضل هو المتر منه ب٥جنيه يعني ال٣٠ متر ب١٥٠ جنيه جامد وماسك نفسه وده احسنهم بصراحة ويفضل انك تجيبي منه كل حاجة بصراحة

ده هتلاقيه عند بتوع التنجيد مش شرط محلات القماش وده انا جبت منه لتغطية الكنب من اسفل

بيتم وضعه على الكاوتش قبل الأسفنج ليه؟ علشان مايحصلش احتكاك بين الاسفنج والكاوتش للحفاظ على طول عمر الاسفنج .

ويتم عمل الشلت منه ويتم تغطية الكنب من اسفل

7/القماش الخارجي

وده بتنزلي اي محل قماش واشهر منطقة قماش في مصر شارع الازهر في العتبة  لتعدد الاختيارات والألوان والخامات بتاعة القماش انا عن نفسي اشتريت كتان علشان يستحمل وعلشان التنظيف حلو سادة والمشجر بتاعه لون الموف بصراحة هو اللي عجبني والقماش ده حسب راحتك طبعا القطيفة انعم ولكن عندي أطفال هايتبهدل والاثنين كانوا نفس الثمن كان المتر ب٧٠
من هنا الى هنا وقف على ٦٠ انا كنت عايزه ٤٥متر زوجي سأله التوب كام متر على بعضه قال له ٤٥متر وبيجي متر زيادة فزوجي قال هاخذه بكام من الاخر عايز سعر جملة زوجي قال له ٥٥ جنيه من الاخر المهم قطع الراجل المشجر وده شغال في المحل كان عشرة متر المهم جاء صاحب المحل وقال ماينفعش ال٥٥جنيه ممكن ٦٠ زوجي قال خلاص هانمشي ونتفرج ونشوف الأسعار طبعا قالوا لنا خلاص ماشي وزوجي لم يأخذ التوب كده جعل الراجل يقيسه ويفك التوب علشان نتأكد من ال٤٥متر مظبوطين وبالفعل طلعوا مظبوطين.

لازم تخلي بالك من الفصال ويكون معاك حد شاطر والفرجة على القماش كويس علشان اي عيوب لا تتفاجئي بها لما تروحي البيت والمشوار مكلف جهد ومواصلات وشيلة تقيلة
ومهم مراجعة الفلوس وعدها مهم كل الحاجات دي تخلي بالك منها وانتي هناك.

8/كرتون

عادة وكل اللي اتفرجت عليه أن الكنبات بتكون مغطاة بقماش من الظهر خفيف ثم قماش الكسوة وأحيانا بيكون لون او قماش تاني علشان يوفر في قماش الكسوة ماعدا الركنة ولكن انا حبيت الظهر يكون جامد وماسك نفسه

هي عبارة عن لوحات كرتون مربعة بمقاسات واحدة توضع لظهر الركنات من الخلف وده مش اي حد بيعمله انا اكتشفته وانا بتفرج على ركنة وجدت ضهرها ناشف افتكرت أنه خشب وانا عارفة أن الركنات أو الكنبات بتكون فارغة من الخلف سألت الراجل قالي ده كرتون لما شفت الكرتون عند الراجل اللي بشتري الأسفنج سألته عليه  واشتريت الواحدة كانت ب٢جنيه اشتريت ١٠  استخدمت ٨ونصف

9/دباسة التنجيد

دباسة وهي ماكينة وأداة التنجيد الأساسية ..يوضع بداخلها دبابيس لتدبيس الكاوتش و القماش في الخشب انا اشتريتها من العتبة استيراد تايوان

10/دبابيس
 العلبة فيها ٥٠٠ دبوس انا استخدمت في الركنة ٤علب علشان انا فكيت حاجات كتير علشان التظبيط

11/غراء (لزق )
 لعملية الصاق الاسفنج

  وده نوعين
 النوع الأول: عادي بالفرشاة وده بيكون لزوجته تقيلة وبيجف بسرعة


ده العادي اللي بالفرشة ولكن بصراحة تقيل وصعب وبيخلص بسرعة


وده من الخلف
النوع الثاني :الرش بالكمبورسور وده بيكون خفيف وسهل في استعماله وفيه بركة وبيمسك حلو جدا


ده شكل زجاجة الغراء الذي يوضع في جهاز الرش علبة لتر




هذا شكل الزجاجة ال3 لتر خلصت كلها على الركنة

دي اللي اشتريتها المرة الثانية اسمها البرنس مكتوب بالإنجليزي بتوضع في جهاز الرش (كمبورسور)
على فاكرة ممكن تأجري

الكمبورسور

بيتأجر في اليوم ب50 عند ناس و100 عند ناس تانية انا عارفة انه فرق ولكن ده اللي من واقع السؤال
أنا لم أستخدمه أنا استخدمت فرشة دهان نزلت اشتريتها

12/بعض الأدوات المساعدة

محتاجة طبعا 
مقص 
وماكينة خياطة 

طبعاً الماكينة لأنك بتحتاجي تخيطي القماش من أماكن معينة ولو قلت لك ان ممكن تعمليها عند خياطة ممكن بس انا بصراحة فكيت اكتر من مرة علشان اظبط شكل واظبط مقاس وكل شوية اظبط القماش واقيس وهكذا طول فترة العمل بتاعة القماش 

هل كل التنجيد يحتاج إلى ماكينة خياطة؟ لأ هناك موديلات وتصميمات كلها تدبيس القماش في الخشب ولا نحتاج الى الخياطة 

ونحتاج إلى بعض قطع القماش القديم من اى حاجة 

لإنك سوف تحتاجين لبعض الوصلات اللي هاتدخل في داخل الركنة ونشد منها وندبس تكون من قماش عادي علشان توفري في القماش الغالي

بكر خيط لون القماش اللي انتي جبتيه
وابر ماكينة
>>>>>>>>>>>>>>>>

أترككم على خير 
والله ولي التوفيق
أختكم أم أسوة