نصيحة اليوم: الشاطرة تغزل برجل حمار

يشرفنا زيارتكم

نصيحة اليوم: الشاطرة تغزل برجل حمار

ماهذه الصورة

هذه صورة المضرب بتاعى (ماركة لا أعرف عنها شيئاً)

ولكن هو بطل النصيحة اليوم

 ...وزى مانتم شايفين حجم صغير والسلك بتاعه مفكوك وكان السلك فصل فتم توصيله ولزقه ومازالت أعمل به ولا أبالى

 بعد كده أنكسرت احدى خفاقات المضرب وأصبح بخفاقة واحدة ومازالت أعمل به ولا أبالى ولن أترك مجال عمل الحلويات

المضرب به اثنين من الأزرار واحد للتشغيل و السرعات مع بعض وواحد بتطغطى عليه يزود القوة وانتى طغطة عليه ..

ثم كان الحادث الكبير الذى اسفر عن كسر الزرار المسئول عن تشغيل المضرب والتحكم فى السرعات ولم يبقى منه سوى فتفوتة جيبت دبوس وحاولت احركها لتثبيتها على أخر سرعة رقم 6

 وبقى يشتغل لما أشغل الفيشة على طول يعنى لازم أكون حطة الخلاط فى الوعاء اللى هاضرب فيه واحط الفيشة يشتغل وعلى سرعة واحدة وخفاقة واحدة والحمد لله مازالنا نقوم بعمل الحلويات والتجربة ولن نيأس

هذا الزرار الكبير هو لإخراج الخفاقة واتمنى يعنى محدش يديه عين كده ولاكده.....وبرضوه هاشتغل بيه ان شاء الله

وهذا ما وصل إليه المضرب ونصل إلى نهاية مأساة المضرب وأخر حوداثه حتى الأن وهو وقوعه لينكسر الزرار الباقى ليصبح المضرب بدون أزرار أو سرعات او درجات .....سرعة واحدة وخفاقة واحدة ومازال المضرب متفائل ويعمل بكل ليقاته رغم المعاناة التى مر بها وانا مازالت اشجعه ونقوم معاً بكل ما يمكننا ان نقوم به.

 

فلا تقولى ان مضربى أى كلام او سرعته ضعيفة أو أو أو أو....................

وحدة هاتقولى انا ماعنديش مضرب خالص ....عندك خلاط اشتغلى بيه لحد ماتجيبى مضرب ان شاء الله

ماعنديش قطاعات بسكويت ...عندك كوباية قطعى بيها ولما يبقى معاكى فلوس جيبى ولو قطاعة واحدة وبعد شوية جيبى شكل تانى مفيش حد عنده كل حاجة ولكن اللى عايز يعمل حاجة هاجيب ....ولو كل كام شهر لو حوشتى ونزلتى جيبتى حاجة هيكون عندك حاجات كتير ان شاء الله.

المهم ما تقوليش انا ماعنديش اصل انا اصل انا........ اصل انا دى مش هاتخلص.

والشاطرة تغزل ولو بخفاقة واحدة ومن غير زرار

 

كانت معكم أم أسوة ترصد لكم مأساة مضربى لنصل فى نهاية نصيحتنا

إلى

لاتجعلى شيئاً يوقفك أو يعجزك عما تودى تعلمه أوفعله أو تحقيقه فى أى مجال من مجالات الحياة، وكم من رجل اعمال أو عالم أو ناجح بدء من لا شئ حتى أصبح شيئاً ذا قيمة.

وانا اقول نعم الحلويات علشان تنجح محتاجة أدوات وإمكانيات ولكن أبدئى بالبسيط حتى يأتيك الكبير ...وانا وأعوذ بالله من كلمة أنا بطور نفسى وكل مرة باشترى حاجة محتاجها لحلوى عايزة اجربها..وسوف اشترى مضرب أحدث أو الخفاق الكبير ولكن حتى أشتريه لن أتوقف .....

أختك فى الله أم أسوة