أرجو ان يعجبكم الموضوع ويكون مفيد لكم ....والرد عليه ولو بكلمة شكراً إذا أضاف لكم جديد وتذكروا من لم يشكر الناس لم يشكر الله تعالى....ان اصبت فمن الله وان اخطأت فمن نفسي والشيطان....أختكم فى الله أم أسوة
السلام عليكم ورحمة الله وبركاته
بسم الله الرحمن الرحيم
عاملين ايه ياناس ياطيبين يارب تكونوا بخير
علم نفسك بنفسك
من فترة وجدت واحدة من الأصدقاء مشيرة فيديو الكيكة اللي شفتوه عجبتني وقلت
ان شاء الله افكر اعملها وحطتها في دماغي
هذه صورة الكيكة اللي شفتها والفيديو على الصفحة مهم تتفرجوا عليه
كان نفسي اصور اللي عملته فيديو بس بصراحة لم يكن هناك متسع من وقت
ومن كام يوم قررت اني اعملها وكان يوم والحمد لله صعب لإني كان ورائي عمل
أكل لهذا اليوم فقررت ابدأ بالحاجة الحلوة الأول علشان تاخد تركيزي ومجهودي والأكل
بعديها.... تمام
جيت اجهز
التجهيزات القلبية نيتي كنت افرح بيها الأولاد لإنهم طالبوا مني من فترة
تورتة وكمان كان مر على كتب كتابي عشرسنوات فقلت افاجئ زوجي لإنشغالنا بمرض وتطور
حالة الوالد فحبيت ننعش هذا الجو ثم الإستعانة بالله والإستغفار طول ما انتي وقفة
على قد ماتفتكري لما تقرئي كلامي تفتكري ان شاء الله
الأدوات وجدت اني محتاجة 3 صواني مدورة لإني قررت اني اعمل تلات الوان فقط
ولاقيت اني والحمد لله ماعنديش غير صينية مدورة كبيرة مينفعش اعمل بيها وواحدة
صغيرة معوجة وحالتها صعبة اعمل ايه كانت والدتي اشترت لي صينية وردة هدية قلت خلاص
اعمل فيها واقطع بالصينة المعوجة على ادها تمام
قبل ماعمل الكيكة لازم اضرب الكريمة واشيلها في الثلاجة وقبلها كنت حطت لبن
في الفريز يسقع والعلبة اللي هاضرب فيها مهم وضعها في الفريزر لتكون ساقعة
فتحت وجدت كيس الكريمة أخذته وبدئت اضرب وبدئت اشعر بشئ غريب هذه ليست
كريمة هذا ايس كريم فانيليا يالا الروعة وكانت اول صدمة وذهبت لمكان خزين الحلويات
وأخذت كيس الكريمة الصحيح وضربت وماذا أفعل فى الأيس كريم ده حتى مش ايس كريم لإني
ضربت الأيس كريم بمقدار لبن الكريمة اللي بيكون اقل بكتير من مقدار لبن الأيس كريم
فطلع ايس كريم كريمة المهم قلت مش هاغلب معاك هاشوفلك صرفة حطتهم فى الثلاجة
هاعمل الكيكة طريقتها في الصفحة هي طريقة واحدة مش بغيرها بعمل بيها على
طول طيب هي صينية واحدة خلاص هاعمل ايه اعمل الكيكة واصب واسوي واطلع والكيكة تهدى
شوية واقلب الكيكة على شبكة الشواية علشان هى سخنة تتهوى كويس واغسل الصينية
وانشفها وارجع اعمل الكيكة التانية واقلب بعد ما اكون شيلت الأولى فى طبق وهكذا في
الكيكة الثالثة مجهود ووقت طبعاً بس هاعمل ايه هاقول مافيش ماعنديش مش هاعمل حاجة
ومش هاجيب حاجة لإن هناك أولويات كتير ولكن ان شاء الله انا عندي امل اني اجيب
فيما بعد لكن لحد ما اجيب هافضل ادور على اللي عندي وهاعمل بيه ان شاء الله المهم
كان غسالتي بتتصلح واتصل بي زوجي يخبرني ان الناس على الباب والكيكة في لحظاتها
الأخيرة والناس بتخبط وكان يوم رائع اعمل ايه قفلت على الكيكة وجريت افتح لهم وقلت
تكمل السوى الأخير فى سخونية الفرن سيبتهم يركبوا الغسالة وطلعت جري اطلعها كان
وشها اتحمر بس ده كان الجزء الزيادة اللي كانت بتقطعه من فوق زي الفيديو وقلت
الحمد لله وجريت اخلص معهم وماشيو وجريت اكمل
خلصت الكيكات والحمدلله هاقطع هاتي القطاعات ماعنديش شفتي هى عندها تلات
مقاسات حطتهم على الكيكة بنظام علشان الدوائر تطلع مظبوطة كويس طيب اعمل ايه جيبت
الصينية المعوجة واقطعت بيها علشان احصل عى كيكة مدورة اصلاً واشيل بروز الوردة
والحمد لله حصلت على تلات كيكات مدورة بمجهود لإن حرف الصينية مش زى القطاعة وكمان
كنت بقطع الكيكة وهى سخنة لو انتي لسة بتتعلمي او حتة شاطرة لازم الكيكة تبرد ده
كمان انتي ممكن تعمليها فى يوم وتغليفها بأكياس كويس وتاني يوم تكملي التزويق
والشغل علشان ماتتعبيش وكمان الشغل في الكيكة بيكون اسهل كتير وانا كنت بعمل كده
في بعض الأوقات ولكني عارفة ظروفي ممكن يحصل اي حاجة ماقدرش اكملها كان لازم اخلص
كل حاجة في وقتها
انا كده حصلت على كيكات بدورة بس لسة ماقطعتش التلات اجزاء في كل كيكة جيبت
طبق غويض وقعدت اجرب وظبطتة وقطعت براحة وتمت والحمد لله وجيبت طبق شوربة وقطعت
التانية وجيبت كوباية مناسبة وقطعت اخر حاجة كل ده كان مجهود لإن الكيكة سخنة
بتلزق فى الطبق وبتطلع حرارة والحمد لله
ابدء اركز علشان نلزق ومانتلخبطش علشان كل كيكة لابد وان يكون فيها الثلاث
الوان ظبط والزق بالكريمة زى الفيديو وفجأة بعد ما لزقت وجدت اني لزقت حاجة غلط
يارب دي كريمة علشان افصل في احتمال قطعها ولكن مش هابوظ الجهود ده باني استسلم
لهذا الخطأ قلت بسم الله وبراحة شيلتها وظبطتها والحمد لله تتخيلوا كل ده وفي
كتاكيت اتنين بتشد فيك من رجلك وبتزقك علشان تاكل او تشرب او عياط وزن من غير سبب
وواحد منهم عنده برد وسخن مش راضي ياكل ولايشرب عايزك تشيليه وعياط تحطي في السرير
عياط تطبطبي عياط والحمدلله
هابدء اركب الكيكات فوق بعض طبعاً الكيكة بتاعتي اكبر من الفيديو بكتير
علشان اشيل كيكة مقطوعة ومتلزقة وكبيرة كنت خايفة تتقطع من اى حتة هما كانوا على
الرخامة عايزة ازوقهم بعمل ايه ماعنديش استند التزويق باجيب صينية واقلبها واحط
عليها الكيكة
هابدء الزق بالكريمة الثلاث كيكات فوق بعض
بدوق الكريمة الشانتيه ملهاش طعم وماعنديش عسل ابيض كنت بطعمها بيه ومش بحب
السكر فجتلي فكرة حطيت نسبة من الأيس كريم وكنت خايفة انه يلخبط قوام الكريمة ولكن
الحمد لله وبدئت اظبط النسب واضرب لحد ماحصلت على طعم تحفة وقوام الكريمة وكنت
سعيدة جداً عارفين ليه لإن كل تورتة او جاتوه من بره اكل الكريمة واقول دي مش
كريمة شانتيه ونفسي اعرف بيحطوا عليها ايه الكريمة بتاعتي كانت نفس الطعم سر الطعم
كان صدفة وده سر اهديه اليك يكفيك انك استطاعتي ان تقرئي كل هذا
نبدء نحط الكيكة ونضع الكريمة وهكذا زي الفيديو وزوقت زيها وجيبت مسطرة
الأولاد مع إضافة كنت اتفرجت عليها فى فيديو اجيب مية سخنة على النار تساوي
بالمسطرة وتشيلي منها الزيادة فى علبة الكريمة وتحطى المسطرة فى المية السخنة
وتطلعى تمسحى بفوطة وتساوي تحصلي على سطح وجناب متساوية وبصراحة كنت سعيدة
بالنتيجة طبعاً احتاجت كريمة وايس كريم كتير اتفضل منهم شوية بس لازم علشان تكون
فى طبقة من 1 الى 2 سم كريمة علشان تبقى زى بتاعة بره
ومن الجناب وضعت جوز هند وعلى حرف الكيكة واللي بيقع من جوز الهند بترجعى
تاني تلزيقه وتطغطى بالسكينة لحد ماتلاقي السكينة نظيفة مش بيطلع فيها كريمة يبقى
الكيكة اتغطت كويس
الفستونات اللي عملتها كانت سهلة بس ماتعرفيش عملتها ازاى ماعنديش كيس كريمة
ولكن عندى البتاع الأنبوبة البلاستيك بتاعة الكريمة ادور عليها مش لاقيها خلاص
تعبت ومافيش دماغ لإني ابذل مجهود في البحث والأولاد جاءوا من المدرسة وهرج ومرج
والأولاد الصغيرين تحت رجلي طلبت من الأولاد ياخدوهم ويطلعوا بره حتى انتهى
اللحظات الأخيرة جيبت قمع البيتي فور وكيس بلاستيك خرمته من الطرف وحطيت القمع
وحطيت الكريمة وبراحة علشان الكيس مايتقطعش من ضغط الكريمة وعملت الفستونات ووزعت
حبوب الشيكوبن بنظام على الحرف عند كل فستونة ثم الداخل دائرة ثم الفراغات
اللحظة الأخيرة طبعاً انا حطاها على صينية الفرن شكلها مش ولا بد وكمان
مطرح التزين طيب انا عايزة استمتع بشكلها فى طبق زجاج وافرح بيها لا تتخيلوا
هاشيلها ازاي لو كيكة عادية بجيب واحدة من طقم التوزيع اللي بنخرج بيها المكرونة
الباشميل ومن ايد وسكينة عريضة من ايد واشيل واحط بسرعة والطبق لازق فى الصينية
ولكن الكيكة كبيرة وتقلت بعد التزين ومتركبة قطع كبيرة خايفة تتفصل من اى جزء بصراحة
كان لابد من مساعدة ندهت لبنيتي حبيبتي الكبيرة وقلت انا عايزاك فى مهمة هاتقدري
عليها ياعسل قالت لي ياماما انا جاهزة قلتلها تماما ياعسل انا عايزة انقل الكيكة
دي من هنا لهنا ووضعت سكينة من الشمال وسكينة من اليمين وبتاعة الباشميل فى النصف
انا هاشيل من اليمين والنصف وهى من الشمال ولكن كانت خايفة قلت لها فاكرة البرنامج
اللي كنا بنتفرج عليه فى فتافيت زمان وهما في المسابقة لإعداد التورتات الكبيرة
كان اهم لحظة هى نقلها من مطبخ العمل لحد مكان التحكيم ضحكت وقالت لي فاكرة ياماما
قلت لها يلا نكون شاطرين وننقلها وبالفعل نقلناها وضحكت وقلنا عملناها والحمد لله
ووضعتها فى الثلاجة ولإنهم كانوا نفسهم ياكلوا منها ولكن هما عارفين ان بابا لازم
يشوفها الأول وأول قطعة بتكون ليه والكل بعد كده ياكل ولكن ناموا يومها قبل بابا
ما يجي فقطعت منها الصبح وصورتها والحمد لله كلهم كانوا مبسوطين بيها جداً
ونقول كلنا كما علمنا الحبيب المصطفى صلى الله عليه وسلم الحمد لله الذي
بنعمته الصالحات عند اتمام اي عمل حياتنا كلها فى كل حاجة اكلنا وشربنا وحبنا
لأولادنا لازم يكون مرتبط بدينا علشان ربنا يبارك لنا فى حياتنا
حياتي كلها لله عمل مش جملة بتتقال
كل الأدوات اللي استخدمتها واتكلمت عليها معاكم صورتها
انا عملتها من غير ادوات انتي كمان ممكن تعملي اي حاجة اوعي تقفي عند
ماعنديش وماعرفش حاولي وجربي واتعلمي وافشلي وانجحى مش عايزة اقولك انا علمت نفسي
بنفسي باتفرج واجرب وياما حاجات ياريت اقولك اكلنها مش حلوة لأ والله كانت بتترمي
على طول فى الزبالة كنت بزعل واقول حرام فلوس بتضيع بيض ودقيق وزبدة انا مش هاعمل
تاني بس كنت ارجع واقول انا مش قصدى انها تبوظ معلش اجرب تاني بعد ما اكون دورت
عليها تاني ودورت على اسباب فشلها اواكون اكتشفتها من خلال التجربة
هو مش موضوع هاتقرئيه وتقولي الله لأ هو موضوع علشان تتعملي زي ما انا
اتعلمت من ناس كتير كانوا بيكتبوا
معلش طولت عليك بس حبيت تعيشي معايا مش كل حاجة حلوة تشوفيها تفتكري صحبتها
عملتها بسهولة ودي شاطرة ودي عندها وقت ودي ست فاضية هى وصلتك سهلة ولكن المجهود
اللي كان وراها كبير جداً جداً جداً
لقد بدئت العمل في الثامنة صباحاً وانتهيت في الرابعة والنصف عصراً
علشان في اولاد صغيرين علشان ولم يكن هناك الأدوات التي ان وجدت لسهلت كثيراً جداً جداً
يارب أكون افدتكم باللي عرفته وانا فى انتظار اى استفسار
أختكم في الله أم أسوة
